Волейболдан Қазақстан чемпионатында «Жайық» екінші орында

Волейболдан ерлердің Ұлттық лига командалары арасында ХХХІІ Қазақстан чемпионатында Оралдың «Жайығы» екінші орынға көтерілді, деп хабарлайды Sport Plus Qazaqstan.

Оралдағы «Орал» спорт кешенінде өтіп жатқан үшінші тур ойындарында Виктор Козик жаттықтыратын батысқазақстандықтар «Ұшқын-Көкшетау» командасынан 3:0 (25:17, 25:23, 25:18) есебімен басым түсті.

Бұған дейін екінші сатыда келе жатқан «Тараз» тартысты матчта «Есілге» (СҚО) есе жіберді – 2:3 (25:27, 21:25, 25:23, 25:22, 11:15).

Осылайша, «Жайық» пен «Тараз» 27 ұпайдан жинап, доп айырмашылығы бойынша оралдықтар екінші сатыға шықты.

«Ақтөбені» 3:0 (25:23, 25:22, 25:19) есебімен тізе бүктірген «Павлодар» 35 ұпаймен бұрынғыша көш бастап келеді.