Теннистен Қазақстан әйелдер құрамасында жаңа капитан сайланды
Қазақстан теннис федерациясы басшылығының шешімімен әйелдер ұлттық командасының капитаны ауыстырылды, деп хабарлайды Sport Plus Qazaqstan.
Ұлттық құраманы енді Юрий Щукин басқарады, бұрынғы капитан Ярослава Шведова болған. Шведова 2020 жылдың ақпанынан 2021 жылдың сәуіріне дейін ұлттық құраманың ойыншысы және капитаны ретінде қызмет етті. Содан кейін ол тек капитан болып қалды. Юрий Щукин соңғы жылы әйелдер құрамасында көмекші жаттықтырушы болып жұмыс істеді және 2020 жылдың наурызынан бастап Қазақстан ерлер құрамасының капитаны болды.
Қазақстан теннис федерациясының вице-президенті Диас Досқараев бұл кадрлық шешімге түсініктеме берді:
«Біз әйелдер ұлттық командасында ештеңені түбегейлі өзгертпейміз, тек шағын түзетулер енгіземіз. Бұрын Юрий әйелдер құрамасында жаттықтырушы, ал Ярослава капитан болды. Енді бұл ретте Щукин құраманы басқарады, ал Шведова оған көмектеседі. Яғни, кадрлардың ауысуы болды, бұл ұлттық құраманың биылғы маусымда сәтті өнер көрсетуіне мүмкіндік береді деп үміттенеміз».
