Sport+ Қазақстанның Паралимпиадалық комитетімен ынтымақтастық туралы меморандумға қол қойды
Sport+ медиатобы мен Қазақстан Республикасының Ұлттық Паралимпиадалық комитеті ақпараттық әріптестік туралы келісімге келді. Құжатқа медиатоптың бас директоры Олжас Абраев пен комитет президенті Қайрат Боранбаев қол қойды.
Ынтымақтастық аясындағы алғашқы бірлескен жоба — 11–14 тамыз аралығында Астанада өтетін Азия Паралимпиадалық комитетінің VIII Бас Ассамблеясына ақпараттық қолдау көрсету болмақ.
Меморандумға сәйкес, медиатоп Комитеттің спорттық және әлеуметтік бастамаларын жан-жақты ақпараттандырып, параспорт саласындағы жаңалықтарды және танымал параспортшылардың тағдырлары мен жетістіктерін кеңінен насихаттайтын болады.
«Паралимпиадалық спорт қарқынды дамып, танымал бола түсуде. Бұл үрдіс Қазақстанда да белсенді байқалады. Бұл — Ұлттық Паралимпиадалық комитет пен оның басшысы Қайрат Боранбаевтың үлкен еңбегінің нәтижесі. Бізді біріктіретін ортақ идея бар — спортты дамыту, оның қолжетімділігін арттыру және салауатты ұлт қалыптастыру. Бұл әріптестік арна үшін де, комитет үшін де нәтижелі болады деп сенеміз. Эфирге шығатын контент спортқа әлі келмеген жандар үшін қосымша мотивация болады, ал спортшылардың оқиғалары шабыт көзіне айналатынына сенеміз», — деді Sport+ медиатобының бас директоры Олжас Абраев.
«Sport+ телеарнасына және тікелей Олжас Абраевқа параспортты ақпараттық қолдауға бағытталған бастамалары үшін алғыс білдіремін. Бұл — біздің алғашқы әріптестігіміз емес. Енді оны кеңейтіп, параспорт мәселелерін бұқаралық ақпарат құралдары арқылы тереңірек жеткізуге ниеттіміз. Арна бұған дейін де ерекше көңіл бөліп келді, енді контент көлемі артады — бұл тек спорттық емес, параспортшылардың өмірі туралы да мазмұн болады. Спорт арнасымен осындай ресми әріптестік туралы алғаш рет жариялауға мүмкіндік туғанына қуаныштымыз», — деді Қазақстанның Ұлттық Паралимпиадалық комитетінің президенті Қайрат Боранбаев.
