Қазақстан құрамасы волейболды отырып ойнаудан Паралимпиаданы бесінші орынмен аяқтады

Қазақстан құрамасы отырып ойнау волейболынан 2024 жылғы Паралимпиада ойындарын бесінші орынмен аяқтады, деп хабарлайды Sport Plus Qazaqstan.

Ел құрамасы бесінші орын үшін сайыста Бразилиямен кездесті. Алғашқы екі кезеңде қазақстандық спортшылар қарсыласын (25:19) айқын басымдықпен жеңген еді. Үшінші кезең екі құрама арасында тартысты өтті. Десе де ел құрамасы тағы да 25:19 есебімен басым түсіп, дүбірлі доданы бесінші орынмен аяқтады. Осылайша жалпы есепте қарсыласын 3:0 есебімен жеңді.

Қазақстандық спортшылар А тобында Франция, Босния және Герцоговина, Египетпен сынға түсті. Алдымен Францияны 3:0 есебімен жеңіп, одан кейін Босния және Герцоговинаға 2:3, Египетке 1:3 есебімен есе жіберді.

Ал 7-орын сайыста Украина құрамасы Францияны 3:0 есебімен жеңді. Енді 5 қыркүйекте жартылай финалда Босния және Герцоговина - Германия, Иран - Египет шеберлік байқасады.