«Қазақстан Барысы 2024» қашан өтетіні белгілі болды

Қазақ күресінің «Қазақстан Барысы» республикалық турнирі биыл қашан өтетіні жарияланды, деп хабарлайды Sport+.

Астанада қазақ күресінен XIII Республикалық «Қазақстан Барысы» турнирі 26 қазанда өтеді. Бұл турнирде облыстық жарыстардың қорытындысы бойынша іріктелген еліміздің ең мықты балуандары бақ сынайтын болады. Олар еліміздің 17 облысы мен Республикалық маңызы бар 3 қала — Астана, Алматы және Шымкент қалаларының спортшылары. Сондай-ақ турнирге өткен жылғы «Қазақстан Барысы» жеңімпазы мен «Әскер Барысы» екі балуаны қатысады. Турнирдің нәтижесі бойынша ең мықты балуан анықталып, ол 15 миллион теңге көліміндегі бас жүлдені алады.

25 қазан балуандар салмақ өлшеу рәсімінен өтіп, белдесулер 26 қазан 13:00–де басталады. Жарыста Қазақстанның барлық өңірінен келген 43 балуан «Қазақстан Барысы — 2024» алтын белдігі үшін күреседі. Турнирдің жалпы жүлде қоры 27 100 000 теңгені құрайды, оның ішінде 3 720 000 теңге спортшылардың жаттықтырушыларына беріледі. Жүлделер келесідей бөлінеді: 1-орын үшін — 15 000 000 теңге, 2-орын үшін — 3 300 000 теңге, 3-орын үшін — 1 080 000 теңге. Әр жеңіске жеткен белдесуі үшін балуан 100 000 теңге алады.

Ұйымдастыру тобының мәліметінше, биыл көрермендер жарысқа тегін кіре алады.