«Ордабасы» трансферлік бомба дайындап жатыр ма?

Ел чемпионы «Ордабасының» алғашқы жаңа ойыншысы молдовалық «Шерифтің» капитаны Амин Талал атануы мүмкін, деп хабарлайды Sport Plus Qazaqstan.  

Өткен маусымның соңында мароккалық футболшының агенттері шымкенттік «Ордабасыға» футболшысының қызметін ұсынды. Қазір келіссөздер процесінің соңғы кезеңі жүріп жатыр.

Амин Талал екі маусымда «Шерифте» ойнап, команданың капитаны болды. Бұған дейін ол Францияның «Орлеан» және «Бастия» командаларында өнер көрсетті.

2023 жылғы маусымның қорытындысы бойынша Талал Молдова чемпионатының үздік жартылай қорғаушысы болып танылды.

Амин орталық жартылай қорғаушы позициясында ойнайды және УЕФА Еуропа Лигасының топтық кезеңінде римдік «Рома» және чехиялық «Славия» сияқты клубтарға қарсы ойын тәжірибесі бар.

«Шериф» сапында Талал 40 матч өткізіп, 12 гол соғып, 5 нәтижелі пас берді.