ITA Алексей Ниге қатысты шешімді жеңілдетті
Халықаралық тестілеу агенттігі (ITA) бұрын ауыр атлетикадан Қазақстан құрамасының бас бапкері болған Алексей Ниге қатысты шешімін қайта қарап, жеңілдетті, деп хабарлайды Sport+.
Бұған дейін ұлттық құраманы Бейжің (2008), Лондон (2012) және Рио-де-Жанейро (2016) Олимпиадаларында қамтыған ірі допинг дауына байланысты өмір бойына спорттан шеттетілген бас бапкердің жазасы төрт жылға дейін қысқартылды. Бұл ақпаратты Қазақстан Республикасы ауыр атлетика федерациясы растады.
ITA тарапынан мұндай күтпеген және таңқаларлық шешімнің қабылдану себептері белгісіз. Алайда 63 жастағы бапкердің апелляция түсіріп, оны жеңіп шыққан болуы мүмкін деген болжам бар.
Айта кету керек, тек Алексей Ни ғана емес, оның інісі Виктор Ни де осындай жеңілдікке ие болды. Виктор Ни, Алексей Геннадьевичтің басшылығы кезінде құраманың аға бапкері болған еді.
