International Table Tennis Federation туы Қазақстан еліне салтанатты түрде табысталды
2026 жылғы 10 мамырда Лондон қаласында өтіп жатқан әлем чемпионаты аясында International Table Tennis Federation туын 2027 жылғы әлем чемпионатының болашақ ұйымдастырушысы — Қазақстан еліне салтанатты түрде тапсыру рәсімі өтті.
«Әлем чемпионатының Астана қаласында өтуі — Қазақстандағы үстел теннисінің қарқынды дамуы мен өсімінің мойындалуы. Бұл — әлемдік деңгейдегі турнир өткізіп қана қоймай, елдің халықаралық спорт аренасындағы беделін нығайтуға берілген мүмкіндік. Тудың Қазақстанға табысталуы — елге болашақ әлем чемпионатын қабылдаушы мемлекет ретінде көрсетілген сенімнің белгісі. Біз Астана қаласы жоғары деңгейдегі ұйымдастыруды қамтамасыз етіп, әлемдік үстел теннисінің лайықты алаңына айналатынына сенімдіміз», — деп атап өтті International Table Tennis Federation өкілдері.
Қазақстан үстел теннисінен әлем чемпионатын қабылдайтын Орталық Азиядағы алғашқы ел болады. Бұл — бүкіл өңір үшін тарихи оқиға әрі елдің халықаралық имиджін нығайтудың маңызды қадамы.
Чемпионатқа спортшыларды, жаттықтырушыларды, төрешілерді, ұлттық федерациялар делегаттарын және халықаралық спорт қауымдастықтарының өкілдерін қоса алғанда, шамамен 1250 ресми қатысушы келеді деп күтілуде. Сонымен қатар, жарыс шетелдік жанкүйерлер мен елорда қонақтарының да көптеп келуіне ықпал етеді.
Жарыстар бес санат бойынша өтеді:
• ерлер арасындағы жекелей сын
• әйелдер арасындағы жекелей сын
• ерлер арасындағы жұптық сын
• әйелдер арасындағы жұптық сын
• аралас жұптық сын
Қабылдаушы ел ерлер және әйелдер арасындағы жекелей сында 3 спортшыдан, ал әр жұптық санатта 2 жұптан қатыстыруға құқылы.
Сонымен қатар, чемпионат аясында International Table Tennis Federation ұйымының Жыл сайынғы жалпы жиналысы (AGM) мен Атқарушы комитетінің отырысы өтеді.
Еске сала кетейік, әлем чемпионатын Қазақстанда өткізу туралы шешім 2025 жылғы 27 мамырда Доха қаласында өткен International Table Tennis Federation Бас ассамблеясында қабылданған болатын. Өткізу құқығына Қазақстан, Франция, АҚШ, Қытай және Бразилия таласты. Дауыс беру қорытындысы бойынша финалға Қазақстан мен Франция шығып, Қазақстан 54,68% дауыс жинап, Францияның 45,32% нәтижесін басып озып, сенімді жеңіске жетті.
