Александр Недовесов Испанияда ұтылды

Мадридтегі ATP Challenger сериясындағы турнирде жұптық сындағы Қазақстанның бірінші ракеткасы Александр Недовесов алғашқы кездесуде ұтылды, деп хабарлайды  Sport Plus Qazaqstan.

1/8 финалда португалиялық Франсиско Кабраломен бірге Недовесов чех дуэті Петр Ноуза/Патрик Риклге 4:6, 6:1, 5:10 нәтижесімен есе жіберді.

Кездесу 1 сағат 20 минутқа жалғасты. Жақында Португалияда өткен турнирде Недовесов эквадорлық Гонсало Эскобармен бірге жарыс жеңімпазы атанған еді. Сол нәтиженің арқасында Александр өз мансабындағы рекордтық көрсеткішке қол жеткізіп, әлемдік рейтингте бірден бес сатыға көтерілді. Қазіргі уақытта ол жұптық сын тізімінде 39-орында.