Қазақстан - Азия жасөспірімдер Пара ойындарының көшбасшыларының қатарында: Дубайдағы жарыста 68 медаль

Қазақстанның жасөспірімдер паралимпиадалық құрамасы Дубай қаласында өткен Азия жасөспірімдер Пара ойындарындағы өнерін жарқын әрі сенімді түрде аяқтап, халықаралық аренада жоғары дайындық деңгейі мен командалық рухын көрсетті.

Жарыс қорытындысы бойынша қазақстандық спортшылар 68 медаль жеңіп алды: 25 алтын, 23 күміс және 20 қола. Бұл нәтиже Қазақстанның Азиядағы жетекші параспорттық елдердің бірі екенін тағы бір мәрте дәлелдеді.

Қазақстан құрамасы спорттың сегіз түрінен жүлдеге ие болды. Спортшылар тек медаль үшін күресіп қана қоймай, тұрақты түрде жеңіс тұғырынан көрінді. Әсіресе, пара жүзу жарыстары жалпы медаль есебіне айтарлықтай үлес қосты. Сонымен қатар, армрестлинг, пара пауэрлифтинг, пара үстел теннисі, пара таэквондо, пара жеңіл атлетика, бочча және голбол спорт түрлерінде де жоғары нәтижелер тіркелді.

Қазақстан Республикасының Ұлттық Паралимпиада комитетінің президенті Қайрат Боранбаев жасөспірімдер құрамасының жетістігін жоғары бағалап, бұл жеңістің маңыздылығына тоқталды:

«Бұл нәтиже — кездейсоқ жетістік емес. Бұл — спортшылардың, жаттықтырушылардың және бүкіл команданың жүйелі әрі тынымсыз еңбегінің жемісі. Жасөспірімдер ойындары — болашақ жеңістердің іргетасы, мінез бен халықаралық тәжірибе қалыптасатын маңызды кезең. Бүгін біз ертең Қазақстан пара спортының бет-бейнесін айқындайтын жаңа буынды көріп отырмыз».

Азия жасөспірімдер Пара ойындары қазақстандық жас параспортшылар үшін маңызды даму алаңына айналып, жоғары бәсекелестік жағдайында өз мүмкіндіктерін сынауға және үлкен спортқа қадам жасауға мүмкіндік берді.

Қазақстан Республикасының Ұлттық Паралимпиадалық комитеті жасөспірімдер пара спортын дамыту және тұрақты халықаралық нәтижелерге қол жеткізу бағытындағы жүйелі жұмысты жалғастырады.