Ресми түрде: «Астана» 2026/27 маусымында ВТБ Бірыңғай лигасына қайта оралады
«Астана» баскетбол клубы 2026/27 маусымында ВТБ Бірыңғай лигасына қайта оралады, деп хабарлайды Sport+.
Өткен бір жыл ішінде клуб қазақстандық ойыншыларды дамыту бағдарламасын жүзеге асыруды жалғастырып, қаржыландырудың жаңа шарттарына бейімделді.
Қолданыстағы заңнама легионерлердің қатысуына тыйым салмайды, тек оларды бюджет қаражаты есебінен қаржыландыруды шектейді. Өткен маусымда клуб демеушілер мен коммерциялық серіктестердің қаражатын сәтті тартып, FIBA WASL турнирінде өнер көрсетуге қабілетті бәсекеге қабілетті құрам жасақтады. ВТБ Бірыңғай лигасына қайта оралу серіктестік мүмкіндіктерін кеңейтіп, команданы күшейтуге жол ашады.
2011 жылдан бері «Астана» ВТБ Бірыңғай лигасындағы Орталық Азияның жалғыз өкілі болып келеді. Клуб үшін бұл тек жарыстардағы тарих қана емес, сонымен қатар қазақстандық баскетболды халықаралық аренада танытудың маңызды мүмкіндігі.
Қайта оралуда клубтың жастар бағдарламасы да маңызды рөл атқарады. Қазақстандық ойыншылар ВТБ Жастар лигасында толыққанды маусым өткізді, ал 2024/25 маусымында отандық баскетболшылар негізгі команда сапында рекордтық ойын уақытын алды. Бүгінде клуб дамудың келесі кезеңін бастайды: Олег Балашовпен келісімшарт жасалды, құрамға Владимир Ивановтың қосылуы күтілуде, сондай-ақ жақын арада 2022 жылдан бері мақсатты түрде дайындалып келе жатқан жастар жүйесінің ойыншылары негізгі командаға қосылады.
«Астана» дәстүрлі түрде Қазақстан ұлттық құрамасының негізгі ойыншыларын дайындайтын клуб болып саналады. Алда әлем чемпионатына іріктеудің жаңа төрт жылдық кезеңі басталады, және ВТБ Бірыңғай лигасына қатысу қазақстандық баскетболшыларға халықаралық деңгейде табысты өнер көрсету үшін қажетті тәжірибе жинақтауға мүмкіндік береді.
Клуб дамуының қосымша дәлелі ретінде FIBA WASL турниріндегі нәтижелерін атауға болады. «Астана» турнирдің өңірлік кезеңінің финалисі атанып, 2026 жылдың қыркүйегінде өтетін Final 8 кезеңіне тікелей жолдама жеңіп алды. Сонымен қатар клуб Еуропа мен Азия турнирлерінде бір мезгілде өз елінің намысын қорғаған тарихтағы жалғыз команда болып қала береді.
ВТБ Бірыңғай лигасына қайта оралу — клубтың одан әрі дамуы, жас ойыншыларды даярлау және қазақстандық баскетболдың халықаралық аренадағы позициясын нығайту жолындағы маңызды қадам.
