QJ лига турнирінің жаңа маусымының тұсауы кесілді

Футболдан  QJ лига турнирінің алдағы маусымында 54 өңірде жасақталған 18 команда бақ сынайды. Олардың қатарында, футболдан 16 жасқа дейінгі Қазақстан ұлттық құрамасы да бар. Сондай-ақ, биыл алғаш  рет футболдан қыздар лигасының тұсауы кесіледі. Бұл туралы лиганың жаңа маусымына арналған баспасөз мәслихатында хабарланды, деп хабарлайды Sport+

Астанада өткен баспасөз жиынында турнирдің  екі жылдық жұмысы қорытындыланды. Осы уақыт аралығында 226 жасөспірім футболшы жоғары лигалар мен халықаралық матчтарға жолдама алған. Олардың қатарында QJ лигада жарқырап көзге түскен «Қайрат»  академиясының  түлегі, бүгінде лондондық «Челсиге» ауысқан Дастан Сәтпаев бар. Одан бөлек, лиганы ұйымдастырушылар тек қана жас футболшылар деңгейін көтеріп қоймай, бапкерлер мен басқа да мамандарға арналған біліктілік курсын өткізуді дәстүрге айналдырған.

Мәселен, осы жиын барысында бапкерлерден бөлек, әрбір футбол командасының медиа-офицерлері мен маркетологтарға арналған біліктілік арттыру курсы өтті. Бұл басқосуға әрбір команданың бұқаралық ақпарат құралдарымен жұмыс істейтін баспасөз хатшылары жиналып, кризистік жағдайлардан шығу жолдарын, жанкүйерлермен, БАҚ өкілдерімен қарым-қатынас орнату әдістерін талқылады.

QJ лига президенті Рохус  Шох биылғы маусымның басты ерекшеліктеріне тоқтала отырып, футбол жанкүйерлеріне қуанышты жаңалықты жеткізді. Биыл лиганың үздік ойыншыларынан құралған команда әлемге әйгілі футбол академиясы – мадридтік «Атлетиконың» жас ойыншыларымен кездеседі. Аталған матч 23 тамыз күні  Алматыда өтеді.

Белгілі кәсіпкер әрі филантроп, лиганың Қамқоршылар кеңесінің төрағасы Тимур Турлов «Атлетиконың» жайдан-жай таңдалмағанын айтып өтті. 
«Біз тек мықтылармен бәсекелесу арқылы өз қарқынымызды арттыра аламыз. Жыл сайын лига өкілдері  Еуропадағы жақсы деген футбол академияларымен кездесіп жүр. Міне, биыл әйгілі «Атлетиконың» тәрбиеленушілері келеді. Біз  әлем үздіктерінен қорықпауымыз керек. Керісінше, кіл мықтылармен иық  тіресу арқылы өз шеберлігімізді арттырамыз. Жазда өтетін матчта біздің жас ойыншылардан күтер үмітім мол», - дейді Турлов.

QJ лига турнирінің 2025 жылғы маусымында алғаш рет қыздар лигасы басталады. Әзірге, 8 командадан құралған 17 жасқа дейінгі қыздар өзара мықтыны анықтайды. Сонымен қатар, биыл жасөспірімдер лигасына  3  команда қосылды. Олар – футболдан  16 жасқа дейінгі Қазақстан құрамасы, «Жеңіс» және «Хан Тәңірі». Лиганың үшінші маусымы 19 сәуірге  жоспарланған.