Қазақ күресінен ел чемпиондары анықталуда

Таразда қазақ күресінен ересектер арасындағы Қазақстан Республикасының чемпионаты өтуде, деп хабарлайды Sport+

«Тараз-Арена» спорт кешенінде өтіп жатқан байрақты бәсекеге Астана, Алматы және Шымкент қалалары мен 17 облысынан келген 450-ден астам балуан сайысып, кілемде кіл мықтыны анықтауда.

Білекті балуандар бәсекесі КСРО-ның және Қазақстан Республикасының еңбек сіңірген жаттықтырушысы, Жамбыл облысының Құрметті азаматы Жақыт Марат Нұрмұхамбетұлының 80 жылдық мерейтойына орайластырылып отыр. 

Марат Нұрмұхамбетұлы 20 жыл бойы Қазақстанның, 10 жыл бойы КСРО-ның құрамасын басқарып қазақ спортына зор еңбек сіңірген тұлға. Марат Жақыт жалпы 2 еңбек сіңірген спорт шеберін, 25 халықаралық дәрежедегі спорт шеберін, 130 спорт шеберін тәрбиелеген.

Қазақстан Республикасы чемпионатының бағдарламасына сәйкес, балуандар 16 салмақ дәрежесінде сынасады. Ерлер: 55 кг, 60 кг, 66 кг, 74 кг, 82 кг, 90 кг, 100 кг, +100 кг және түйе балуан. Әйелдер: 48 кг, 52 кг, 56 кг, 60 кг, 65 кг, 70 кг, 77 кг, +77 кг.

Қазақстан Республикасының чемпионаты 9 қараша күні өз мәресіне жетеді.