Паделден Қазақстан құрамасының Азия ойындарындағы басты мақсаты аталды

Паделден Қазақстанның ұлттық құрамасының көшбасшысы Евгений Данилов Федерацияның баспасөз қызметіне берген сұхбатында Жапонияда өтетін Азия ойындарындағы алғашқы жарысқа қатысты күтулерімен бөлісті:

«Құрама алдына өте маңызды мақсаттар қойып отыр. Азия ойындарында бәсекелестік өте жоғары болатынын және оңай матчтардың болмайтынын түсінеміз. Дегенмен алдымызға барынша жоғары мақсаттар қоюымыз керек. Қазақстан паделді дамыту жолында үлкен жұмыс атқарды. Сондықтан біздің мақсатымыз — лайықты өнер көрсетіп, ең жоғары орындар үшін күресу. Медаль жеңіп алу — қолжетімді мақсат. Алайда оған жету үшін өте тыңғылықты дайындалу қажет. Паделде спортшылардың физикалық дайындығы, жұптың өзара үйлесімділігі, тактика және психологиялық тұрақтылық көп нәрсені шешеді. Сондықтан қазір дайындық үшін әр мүмкіндікті тиімді пайдалану маңызды».

Падел алғаш рет Азия ойындарының бағдарламасына енгізілді. Бұл спорт түрінен жарыстар қыркүйек айының соңында — қазан айының басында басталады.