Көшпенділер ойындары: Астанада атқа мінгендер шеруі өтті
Алдағы дүниежүзілік көшпенділер ойындарына орай елордалық бір топ белсенді қала көшелерін атпен аралады, деп хабарлайды Sport Plus Qazaqstan.
Таңертең «Барыс Арена» алаңына атқа мінген белсенділер жиналды. Олардың мақсаты – дүниежүзілік көшпенділер ойындарын насихаттау. Жиналған халықтың арасынан ат шеруін ұйымдастырушыны кездестірдік.
«Ұлы дала дүбіріне жақын қалды. Біздің мақсат – көшпенділер ойындарын насихаттау. Бұл шара енді апта сайын өтеді. Біз қазір атқа отырып елорда көшелерін аралап өтеміз. Айта кететін жайт, бұл жерге кәсіби спортшылар емес, белсенділер жиналған, яғни атпен серуендеуге құмар жандар. Біз барша жұртты көшпенділер ойындарын көруге шақырамыз. Себебі біз көшпенді халықпыз, өз ерекшелігімізді мақтан тұтуымыз қажет», - дейді Tengri Road саяхатшылар ат клубының негізін қалаушы Сағадат Темкенов.
