Евгений Березкин: Біздің де, қарсыластың да қарқыны ақсап тұр
«Қызыл-Жар» клубының капитаны Евгений Березкин Sport Plus Qazaqstan сайтына берген сұхбатында команданың жеңіссіз сериясы, сұрмергендік қасиеттері және алдағы елордалық «Астанаға» қарсы ойынға дайындық туралы айтты.
- Үзілістен кейін команда жаттығуды бастады. Жаттығу жұмыстары қалай жүріп жатыр?
- Жаттығу жұмыстары жоспар бойынша жүріп жатыр. Алдағы ойынға дайындалуға уақыт жеткілікті. Елордалық командаға қарсы, жақсы физикалық дайындықта боламыз деген үміттемін.
- Екінші маусым қатарынан команда чемпионатты жақсы бастап, кейін көшбасшыларға ілесе алмай жүр. Сіздің ойыңызша турнир кестесінде фавориттермен қатарласуға не жетіспейді?
- Бұл сұраққа жауап беру қиын. Екі маусымды салыстыруға келмейді. Себебі, мен команданың ойынға, жаттығу процессіне деген дайындығын көріп жүрмін. Шынымды айтсам, кейбір кездесулерде неге жеңіске жетпегенімізді түсінбеймін.
- Бес ойын қатарынан чемпионатта команда жеңіске жете алмауда. Психологиялық тұрғыда қаншалықты командаға әсер етеді? Ұжым ішіндегі микроклимат қандай?
- Психологиялық тұрғыда қаншалықты қаламасаңда өз әсері бар екені анық. Алайда біз позитивті ойлауға тырысамыз. Командадағы микроклимат жақсы. Жігіттер бір-бірімен әзілдесіп, өзара араласады.
- Өткен маусымнан кейін Қазақстан клубтарынан ұсыныс болды ма? Не себепті «Қызылжарда» қалуды жөн көрдіңіз?
- Нақты ұсыныс болған жоқ. Маусымнан кейін бас бапкермен сөйлестім, маған сенім білдіретінін айтты. Сонымен қатар, командада капитанмын, бұл - мен үшін үлкен мотивация.
- Қазір уақытта сіз үздік сұрмергендер қатарындасыз. Осы маусымда индивидуалды тұрғыда алдыңызға мақсаттар қойдыңыз ба?
- Бұл бәсеке қатарында болғаннан кейін, әрине, үздік сұрмерген атанғын келеді. Бірақ, мен үшін команданың нәтижелері маңызды. Қорғаушы, шабуылшы соқса да жеңіске жетсек болғаны.
- Алдағы сенбі өз алаңдарыңызда «Астана» командасын қабылдайсыздар. Командаңыздың қарқынын, мүмкіндіктерін қалай бағалайсыз?
- Мүмкіндік әрдайым бар. Біздің де, қарсыластың да қарқыны ақсап тұр. Біз тек жеңіске ұмтылатынымыз анық. Өз алаңымызда, жанкүйердің ыстық қолдауымен ойнаймыз.
