«Бұл оңай шешім емес». «Астана» мен Қазақстан құрамасының экс-капитаны мансабын аяқтады

«Астана» мен Қазақстан құрамасының бұрынғы капитаны Рустам Мурзағалиев әлеуметтік желідегі парақшасында кәсіби мансабын аяқтайтынын мәлімдеді, деп хабарлайды Sport+.

«Бүгін мен өзім үшін өте қиын шешім қабылдағанымды хабарлаймын — кәсіби спортшы ретіндегі мансабымды аяқтаймын.

Өмірімнің басым бөлігін баскетболға арнадым. Менің жолым туған қалам — Алматыда басталды. Алғашқы жаттығуым да дәл сол жерде өтті, ал алғашқы бапкерім Максим Ахметович Рахимов болды. Мансабымның іргетасын қалап, кәсіби баскетболдағы алғашқы қадамдарымды жасауға көмектескені үшін оған алғысым шексіз.

Әрине, ең алдымен ата-анама үлкен рақмет айтқым келеді. Олар мені ең басынан қолдап, маған сеніп, алға жылжуыма көмектесті. Бүкіл жолымда жанымнан табылып, мен үшін алаңдады, жеңістеріме қуанды және жеңіліске ұшыраған сәттерімде қолдау көрсетті. Мен үшін және менің мансабым үшін жасаған барлық нәрселері үшін оларға ризамын.

Мансабымдағы келесі үлкен кезең «Астана» болды. Валерий Тихоненко — маған сенген, мені байқап, командаға шақырған клубтың алғашқы бас менеджері. Кейін Самсон Аракелян осы жұмысты жалғастырып, маған да сенім білдірді және клубпен бірге өсіп, дамуыма мүмкіндік берді.

Мансабым барысында көптеген бапкерлермен, ойыншылармен және легионерлермен бірге жұмыс істеу бақыты бұйырды. Олардың әрқайсысы менің кәсіби жолымда өзіндік із қалдырып, менің бүгінгі деңгейдегі ойыншы болып қалыптасуыма көмектесті.

Қазақстан ұлттық құрамасы менің мансабымда әрдайым ерекше орын алды. Ұлттық құрама сапында бірде-бір турнирді жіберген емеспін. Ұлттық құраманың жейдесін кигенде де, клуб сапында алаңға шыққанда да әрдайым бар күшімді салуға тырыстым.

Осы жылдар ішінде «Астанамен» бірге елеулі жетістіктерге жеттік: Қазақстанның 12 дүркін чемпионы, Қазақстан кубогының 11 дүркін иегері атандық, WASL мен Азия чемпиондары кубогының қола жүлдесін жеңіп алдық, сондай-ақ әлем чемпионатының іріктеу кезеңінде бесінші орын алдық.

Бүгін мен алға жылжу туралы шешім қабылдадым.

Осы үлкен жолды бірге жүріп өткен барлық адамдарға алғыс айтқым келеді. Бапкерлерге, командадағы әріптестеріме, клуб басшылығына, қызметкерлерге, достарыма және мансабым бойы жанымнан табылған барлық жанға рақмет.

Жанкүйерлерімізге ерекше алғыс. Қолдауларыңызға, сенімдеріңізге және осы жылдардың бәрінде бізді үнемі алға жетелеп келгендеріңізге рақмет. Сіздер — осы тарихтың ажырамас бір бөлшегісіздер.

Әрине, жұбайыма да жеке алғыс айтқым келеді. Кәсіби спорт — тек спортшының ғана жолы емес. Әрбір жаттығудың, ойынның, сапар мен оқу-жаттығу жиынының артында осы жолды сенімен бірге жүріп өтетін отбасы тұрады.

Шыдамдылығың, түсіністігің және қолдауың үшін рақмет. Мансабымның түрлі кезеңдерінде жанымнан табылып, маған сеніп, тіпті қиын сәттерде де үнемі қолдау көрсеткенің үшін алғысым шексіз. Бұл мен үшін өте маңызды.

Бүгін мен кәсіби ойыншы ретіндегі жолымды аяқтаймын. Бұл оңай шешім емес, өйткені баскетбол өмір бойы дерлік менімен бірге болды. Бірақ жаңа парақ ашатын уақыт келгенін түсінемін.

Баскетболмен қоштаспаймын.

Жақында қайта кездесеміз».

Мурзағалиев үшін соңғы турнир Қазақстан құрамасы сапында өнер көрсеткен Азия ойындары болды.