Азамат Дәулетбековтің Wrestling Stars турниріндегі қарсыласы белгілі болды

29 қараша күні Астанада өтетін күрестен Wrestling Stars турниріне қатысатын кезекті балуандардың есімі анықталды, деп хабарлайды Sport+

Еркін күрестен 86 келі салмақта бақ сынайтын Азамат Дәулетбековтің қарсыласы белгілі болды.

Үш дүркін Азия чемпионы, әлем біріншіліктерінің жүлдегері саналатын Азамат осы салмақтағы Ресей чемпионы, осетиялық Алан Багаевпен белдеседі.

Багаев Солтүстік Осетия республиксының Владикавказ қаласында дүниеге келген. Ол кадеттер және жастар арасында әлем чемпионы атанып, әйгілі Ярыгин турнирінде топ жарған.

2024 жылы Ресей чемпионатында бақ сынап, финалда дағыстандық Асхаб Саадуллаевта басым түсті.

Осылайша, талантты балуан еркін күрестен Қазақстан командасының жарқын өкілі Азамат Дәулетбековпен белдеспек.

Күрес түрлерінің насихатын арттыру мақсатында өткізілетін дәстүрлі Wrestling Stars турнирі 29 қараша күні Астанадағы Beeline аренада өтеді.

Турнирді ұйымдастырушы әрі Қазақстан күрес федерациясының вице-президенті Дәурен Жабасовтың айтуынша, жарысқа екі дүркін әлем, төрт дүркін Еуропа чемпионы, италиялық Франк Чамисо, екі дүркін Азия чемпионы Данияр Қайсанов, әлем чемпионатының күміс жүлдегері Қорлан Жақанша, жастар арасындағы әлем чемпионы Исхар Курбаев, еркін күрестен жастар арасындағы әлем чемпионы Начын Куулар бастаған бірнеше балуан қатысады.