«Тобыл» Беларусь құрамасының жартылай қорғаушысын қатарға қосты
«Тобыл» Беларусь құрамасының жартылай қорғаушысы Максим Мякишпен келісімшартқа қол қойғанын мәлімдеді, деп хабарлайды Sport+ Қостанайлық клубтың баспасөз қызметіне сілтеме жасап.
Максим Мякиш 2000 жылдың 3 наурызында Гродно қаласында дүниеге келген және гроднолық «Неман» клубының түлегі. Әр жылдары Беларусь клубтарында өнер көрсетіп, сондай-ақ Португалияда «Униан Лейрия» жүйесінде бір маусым ойнаған.
Оның мансабында борисовтық БАТЭ клубы да болды. Бұл команда сапында ол жастар біріншілігінің жеңімпазы атанды.
2021 жылдан 2024 жылға дейін Мякиш «Торпедо-БелАЗ» клубының намысын қорғап, барлық турнирде 95 матч өткізді. Командасымен бірге Беларусь Кубогы мен Суперкубогын жеңіп алып, ел чемпионатында екі рет қола жүлдегер атанды.
2025 жылдың қаңтарында жартылай қорғаушы минскілік «Динамо» клубына ауысты.
Халықаралық деңгейде Максим Мякиш Беларусьтің жасөспірімдер және жастар құрамаларында ойнаған, ал 2025 жылы ұлттық құрама сапында дебют жасады.
