Талғат Жайсанбаев: Кабирхан бар болғаны 4 жаста, оның психикасы толық қалыптаспаған

Елімізде классикалық ат жарысын дамытумен айналысып жүрген азаматтардың бірі Талғат Жайсанбаев көпшіліктің сүйіктісіне айналған Кабирханның алдағы тағдырына қатысты өз пікірін білдірді:

«Кабирханды былтыр өте көп бәйгеге қосты, сондықтан енді оған қиын болуы мүмкін. Асыл тұқымды аттарды кәнігі кәсіби спортшыға теңесе болады. Өйткені олар да психологиялық тұрғыда сынса, қайта қалпына келтіру өте қиын. Менің білуімше, алдағы уақытта оны бір жарысқа қосып, содан кейін Кабирханның тағдыры шешіледі. 

Кезінде атақты Эррогейт асыл тұқымды ағылшын аты болды. Ірі жарыстарды жеңіп жүріп, 2019 жылы Дубайдағы сайыста басын тартып кетіп қалған еді.

Асыл тұқымды аттардың жүйке жүйесі өте нәзік болады, сондықтан оның ескеретін тұстары көп. Мысалы, Кабирхан бар болғаны 4 жаста, психикасы толық қалыптаспаған. Бұл — бапкердің кәсіби жұмысы көрінетін жағдай. Тұлпар жаттығуда шабуы мүмкін, өйткені бұл кезде физикалық тұсы іске қосылады, ал жарыста рухтың оянуы рөл ойнайды.

Соңғы екі жылда классикалық ат шабысын Қазақстанда қарқынды дамытуға барымызды салып жүрміз. 1 мамыр күні Алматыда бұрын-соңды болмаған жарыс ұйымдастырылады. 300 қатысушы болса, соның жартысынан көбі шетелден келеді.

Жалпы Қазақстанда асыл тұқымды аттардың сапасы жақсарып келеді. Бұл — еліміздің селекциялық жетістіктері деп айтуға толық негіз бар».