Рауан Бекболат: Үш жарақаттан кейін де толық дайынмын

«Alash Pride» турнирі қарсаңында қазақстандық жауынгер Рауан Бекболат Sport+ сайтына сұхбат беріп, жарақаттан кейінгі кезеңі, қазіргі дайындығы және алдағы жекпе-жегі туралы пікір білдірді.

— Рауан, жарақатыңызға байланысты мансабыңызда үлкен үзіліс болды. Осы уақыт аралығында немен айналыстыңыз? Қазіргі бабыңыз қандай?

— Жарақат алған кезеңде де тынымсыз еңбек еттім. Мен жаттығуға жұмыс ретінде қараймын. Жұмыстан қалуға болмайтыны сияқты, жаттығуды да үзген емеспін. Қазіргі бабым жақсы.

— Жарақатыңызды толық емдеп болдыңыз ба?

— Иә, жарақаттарымды толық емдеп шықтым. Менде үш жарақат болды. Омар Соломоновпен жекпе-жек кезінде сол аяғым сынған. Одан кейін жаттығуға қайта кіріскен кезде тіземнің менискісі жыртылды. Үшінші жарақатқа байланысты құлағыма ота жасаттым.

— Бұрынғы қарсыласыңыз Омар Соломонов «Alash Pride» турнирінде африкалық спортшымен жекпе-жек өткізеді. Осы айқас туралы не ойлайсыз? Егер қарсыластардың бірі салмақ талаптарына сай келмей қалса, оны алмастыруға дайынсыз ба?

— Омар — өте мықты қарсылас. Оның африкалық спортшысын мерзімінен бұрын жеңеді деп ойлаймын. Ал алмастыруға 100 пайыз дайынмын. Қайсысы берілсе де, жекпе-жекке шығуға әзірмін.

Аталмыш турнирді 31 мамырда Sport+ телеарнасы тікелей эфирде көрсетеді.