Қазақстандық бокстан 2024 жылғы Олимпиадаға лицензия үшін жекпе-жекте нокдаунмен жеңіске жетті

Қазақстандық боксшы Айбек Оралбай Бусто-Арсициода (Италия) өткен лицензиялық олимпиадалық турнирде екінші жекпе-жек өткізді, деп хабарлайды Sport Plus Qazaqstan. 

1/16 финалда 92 келіге дейінгі салмақ дәрежесінде Оңтүстік Кореядан келген боксшы Юнг Ха Ныль Оралбайға қарсы шықты. Бұл жекпе-жек қазақстандықтың жеңісімен аяқталды. Үшінші раундта Оралбай қарсыласын нокдаунға жіберді.

Осылайша, Айбек Оралбай 1/8 финалға шығып, Парижде (Франция) өтетін 2024 жылғы Олимпиадаға жолдама алу үшін күресті жалғастыруда. Бұған дейін қазақстандық боксшы үнді Санживті жеңген болатын.

Естеріңізге сала кетейік, Олимпиада ойындарына қатысу үшін Бусто-Арсициода 92 кг салмақтағы турнирде ерлер жартылай финалға өтуі керек — медальдық жекпе-жек өткізілмейді.