Қайрат Сәтжанов: 13 қаңтардан алғашқы оқу-жаттығу жиынына кірісеміз

Бокстан Қазақстан ұлттық құрамасының бас бапкері Қайрат Сәтжанов команданың 2025 жылды қалай бастайтынын Olympic.kz сайтына берген сұхбатта айтты:

«13 қаңтар мен 31 қаңтар аралығында жалпы және арнайы физикалық дайындыққа арналған оқу-жаттығу жиындары өтеді. Жиын Түркістан облысындағы «Alma-Tau» базасында ұйымдастырылады. Бұл жиынға бірінші, екінші, үшінші және төртінші нөмірлі спортшылар шақырылады.

25 қаңтарда екі құрам Испанияға аттанады. Онда бір аптаға созылатын оқу-жаттығу жиыны жоспарланған, ал 3-9 ақпан аралығында турнир өтеді. Қалған екі құрам Түркістан облысында жаттығуды жалғастырады. Оқу-жаттығу жиынынан кейін олар Болгарияға барады.

Өздеріңіз білесіздер, онда ең ірі халықаралық турнирлердің бірі — «Странджа кубогы» өткізіледі. Бұл жарысқа көптеген көшбасшы құрама қатысады. Біз олармен бірлескен жаттығулар өткіземіз. Ал 23 ақпанда жарыс ресми түрде басталады.

20 наурыздан бастап Ресейде өтетін бірлескен жиындарға қатысамыз.

Бұл жиындар Кисловодсктегі базада өтеді. Бізбен бірге Ресей, Өзбекстан, Беларусь және тағы басқа елдердің негізгі және қосалқы құрамдары жаттығады. Осы жиындардан кейін халықаралық жарысқа қатысу үшін Хабаровск қаласына аттанамыз. Биылғы басты турнирлер — екі әлем чемпионаты және құрлықтық біріншілік», - деді Сәтжанов.