Париж-2024: Жаңыл Балтабаева Паралимпиада ойындарына жолдама жеңіп алды

Мажарстанның Сегед қаласында өткен пара каноэдан лицензиялық әлем чемпионатында Жаңыл Балтабаева Париж-2024 Паралимпиада ойындарына жолдама жеңіп алды, деп хабарлайды Sport Plus Qazaqstan.

Чемпионаттың В финалында (VL3 классы) өнер көрсеткен қазақстандық спортшы 200 м қашықтықты 1:05.83 секундта бағындырып, мәреге екінші болып жетті.

Осы бәсекеде польшалық Моника Кукла 1:05.45 секунд нәтижесімен бірінші, ал франциялық Елеа Чарвет 1:07.33 нәтижесімен үшінші болып жетті. Жаңыл осымен Паралимпиада ойындарына еліміздің 12-ші лицензиясын иеленді.

Бұған дейін пара каноэдан Спатай Бибарыс, пара пауэрлифтингтен Давид Дегтярев, пара жеңіл атлетикадан Дастан Мұқашбеков, волейболды отырып ойнаудан ұлттық құрама, пара оқ атудан Еркін Ғаббасов, пара жүзуден үш жолдама, пара таеквондодан Нұрлан Домбаев, Камиля Досмалова және Нышан Өмірәлі алған болатын.

Париж-2024 Паралимпиада ойындары тамыздың 28-і мен 8-ші қыркүйек аралығында өтеді.