Оразов футзалдан Әлем Чемпионатындағы тарихи жетістігін пікірледі

Қазақстан құрамасының ойыншысы Біржан Оразов 2024 жылғы футзалдан Әлем Чемпионатында Өзбекстанда орнатқан рекордына пікір білдірді, деп хабарлайды Sport Plus Qazaqstan.

Оның Испания қақпасына топтық кезеңнің алғашқы ойынында соққан голы әлем чемпионаттары тарихындағы ең жылдам гол ретінде танылды.

«Әлем Чемпионаты тарихындағы ең жылдам голдың авторы — Қара көз қазақ баласы. Құттықтауларыңызға шексіз алғыс! Алайда, басты мақсатты ұмытпаймыз. Жарақат немесе басқа кедергілерге қарамастан барымды салуға тырысамын. Алға Қазақстан!», — деп жазды Оразов әлеуметтік желілерде.

Айта кетейік, Оразов 21 қыркүйекте өтетін Жаңа Зеландия құрамасына қарсы соңғы, үшінші тур матчына жарақатына байланысты қатыспайды.