IX қысқы Азия ойындарының факелі мен медальдары таныстырылды

2025 жылы Қытайдың Харбин қаласында өтетін IX қысқы Азия ойындарының ресми факелі, медальдары және әнұраны көпшілікке таныстырылды, деп хабарлайды Sport+.

Синьхуа агенттігінің мәліметінше, Азия ойындары алауының тақырыбы – «Серпін». Бұл атау ойындардың өміршеңдік пен құштарлық рухын білдіреді. Факелдің ұзындығы шамамен 735 мм, ал үстіңгі диаметрі 115 мм шамасында. Алаудың дизайны гүлдеп тұрған сирень гүлін еске салады, ал оның түсі – қытай қызылы, күлгін және мұзды ақ реңктерден тұрады. Бұл түстер Хэйлунцзян провинциясы мен Харбин қаласының қар мен мұзға тән мәдени ерекшеліктерін айшықтайды.

Медальдар дизайнына келсек, олардың тақырыбы – «Жарыс рухы». Алдыңғы бетінде жарыс жолының иілген пішіні мен IX қысқы Азия ойындарының логотипі бейнеленген. Артқы бетінде Ябули қар шаңғы аймағының таулары мен ормандары, сондай-ақ Харбин қаласындағы «Күн аралы» саяхат аймағының символы – «Күн қақпасы» кескіні көрініс тапқан.

Азия ойындарының ресми әнұраны «Харбин қары» деп аталады. Әннің сөзі мен әуені «мұз бен қардың арманы бір, ал Азияның жүрегі бір» идеясына негізделген. Ән Азия елдері мен аймақтары халықтарының бірлігі, сүйіспеншілігі, бейбіт даму және ортақ болашақты құруға деген ұмтылысын паш етеді.

IX қысқы Азия ойындары 2025 жылдың 7-14 ақпан аралығында Қытайдың Хэйлунцзян провинциясындағы Харбин қаласында өтеді. Спортшылар 12 спорт түрі бойынша 64 медаль жиынтығын сарапқа салады.