Юлия Путинцева Испаниямен матч алдында: Біз мықты командамыз, көп нәрсе өзімізге байланысты
Қазақстандық теннисші Юлия Путинцева Билли Джин Кинг кубогының ширек финалында Испания құрамасына қарсы өтетін матч алдындағы көңіл күйімен бөлісті, деп хабарлайды Sport+.
Спортшы алдағы кездесуге дайындығы, командалық рухтың маңызы және өзінің физикалық жағдайы туралы айтты.
Қытайдың Шэньчжэнь қаласында өткен баспасөз мәслихатында Путинцева ұлттық құрамаға жеңіске жетуге көмектесу үшін халықаралық аренадағы тәжірибесін пайдалануға ниетті екенін атап өтті.
«Менің ойымша, тәжірибем алдағы кездесуде маңызды рөл атқаруы мүмкін. Мен әрдайым соңына дейін күресемін және әр матчта, әсіресе Қазақстан атынан өнер көрсеткен кезде, жауынгерлік мінезімді көрсетуге тырысамын. Осы рухты қыздарға да жеткізіп, бірге ең үздік теннисімізді көрсете аламыз деп үміттенемін. Біз шынымен де мықты командамыз және көп нәрсе өзімізге байланысты. Ең бастысы — сенімділікті сақтап, өз жоспарымызды ұстану және әр ұпай үшін күресу», — деді Путинцева.
Теннисші сондай-ақ өзінің физикалық жағдайы мен алдағы матчтарға дайындығы туралы айтып берді. Спортшының сөзінше, маусымның күрделі өтуіне және денсаулығына байланысты мәселелерге қарамастан, қазір өзін әлдеқайда жақсы сезінеді.
«Бұл маусым мен үшін оңай болған жоқ. Жазда денсаулығыма байланысты мәселелер болды, бірақ қазір өзімді әлдеқайда жақсы сезінемін. Теннисте жеңіс те, жеңіліс те болады, әр апта немесе әр ай сайын өз мүмкіндігіңнің ең жоғары деңгейінде өнер көрсету мүмкін емес. Бірақ мен күн сайын жаттығуды, өзіммен жұмыс істеуді жалғастырып, үздік ойынымды көрсету үшін бар күшімді салып жүрмін. Қазір барлық ойым алдағы матчқа және командаға қалай көмектесуге болатынына бағытталған», — деп қосты қазақстандық теннисші.
Еске салайық, 23 қыркүйекте Қазақстан құрамасы Билли Джин Кинг кубогының ширек финалында Испаниямен кездеседі. Қарсыластық Қазақстан уақытымен сағат 14:00–де (жергілікті уақытпен 17:00–де) басталады.
Кездесу екі жекелей және бір жұптық матчтан тұрады. Жартылай финалға шығу үшін командаға екі жеңіс қажет.
Билли Джин Кинг кубогының финалдық кезеңі 22-27 қыркүйек аралығында Қытайдың Шэньчжэнь қаласында өтіп жатыр. Әлем чемпионы атағы үшін сегіз ұлттық құрама таласуда.
Бірде-бір турнирді өткізіп алмау үшін Beeline-нан 24 сағат ішінде тиімді бағамен үй интернетін қосыңыз.
