Футболдан Қазақстан құрамасы бүгін Түркіменстанмен жолдастық кездесу өткізеді

Футболдан Қазақстан ұлттық құрамасы бүгін, 14 наурызда Түркіменстанмен жолдастық кездесу өткізеді, деп хабарлайды Sport Plus Qazaqstan.

Бұл ойын ұлттық құраманың Біріккен Араб Әмірлігінде оқу-жаттығу жиыны аясында ұйымдастырылып отыр. Кездесу сағат 19.00-ге белгіленген. БАӘ-нің Дубай қаласында өтіп жатқан оқу-жаттығу жиынына ойыншылардың басым бөлігі жиналды.

Енді Түркия мен Ресей чемпионатынан Абат Айымбетов, Бақтиер Зайнутдинов, Нұралы Әліп қосылады. Сондықтан олар бүгінгі ойынға қатыса алмайды.

FIFA рейтингінде Түркіменстан құрамасы 141 орында тұр. Екі құрама соңғы рет 1994 жылдың 15 сәуірінде кездескен еді. Бұл ойында құрамалар 0:0 есебіне қанағат білдірді.

Одан бұрын 1992 жылы бір кездесуде 1:0 есебімен тізе бүктірсе, келесі ойында 1:1 есебі тіркелді. Бүгінгі Түрікменстан құрамасымен жабық жолдастық ойын өтеді. Ол телеарналар арқылы көрсетілмейді.