Еуро-2026: Қазақстан футзал құрамасының іріктеу сатысындағы ойын кестесі анықталды

Футзалдан Қазақстан құрамасының 2026 жылғы Еуропа чемпионаты іріктеу сатысындағы ойын кестесі белгілі болды, деп хабарлайды Sport Plus Qazaqstan.

Қазақстандық футзалшылар алтыншы топта Армения, Дания және Албания құрамаларымен ойнайды.

Құрлықтық дода 2026 жылдың 18 қаңтары мен 8 ақпаны аралығында Литва және Латвияда өтеді.

Іріктеу турнирі 2024 жылдың 9 желтоқсанында басталады. Іріктеу сатысында құрамалар әрбір қарсыласымен өз және сырт алаңда екі ойын өткізеді.

Қазақстандық футзалшылар іріктеу кезеңіндегі алғашқы ойынын сырт алаңда биылғы жылдың 13 желтоқсанында Албанияға қарсы өткізсе, 18 желтоқсанда өз алаңында Арменияны қабылдайды.

Ал, 2025 жылдың 1 ақпанында сырт алаңда Даниямен ойнаса, өз алаңында 5 ақпанда Даниямен, 7 наурызда Албаниямен шеберлік байқасады. Соңғы ойынын 12 наурызда Арменияға қарсы өткізеді. 

Ел құрамасы Еуропа чемпионаты финалдық сатысында үш мәрте бақ сынады. 2016 жылы қола жүлдегер атанып, 2018 жылы төртінші орынға табан тіресе, 2022 жылы 1/4 финалға дейін жетті.