Елімізде WorldSkills чемпионатының өңірлік кезеңдері басталады
Жеңімпаздар қараша айында өтетін «WorldSkills Kazakhstan 2024» ұлттық чемпионатына қатысады, деп хабарлайды Sport Plus Qazaqstan.
1 сәуірде WorldSkills чемпионатының аймақтық кезеңдері басталады. Эстафетаны бірінші болып Павлодар облысының колледж студенттері бастайды.
Колледжішілік жарыстардың 243 қатысушысы 50 түрлі салада өздерінің кәсіби шеберліктерін көрсетеді. Өңірлік чемпионаттың нәтижелері осы жылдың мамыр айында белгілі болады.
Бірінші және екінші орын жүлдегерлері дайындықтың келесі кезеңіне жолдама алып, үш ай бойы оқу-жаттығу лагерьлерінде өз дағдыларын жетілдіреді.
Кезең жеңімпазы ұлттық құраманың сапында, Данияда өтетін EuroSkills 2025 Еуропа чемпионатына ел намысын қорғауға аттанады.
