Данияр Елеусінов салмағын ауыстырып, рингке жиі шығатын болады

Үш жылдық үзілістен кейін кәсіпқой рингке қайта оралған Данияр Елеусінов (12-0, 7 КО) салмақ дәрежесін өзгертеді, деп хабарлайды Sport Plus Qazaqstan.

Еске салайық, қазақ боксшысы 28 қыркүйекте Алматыда өткен бокс кешінде филиппиндік Джо Нойнаймен (23-5-2, 11 КО) жұдырықтасып, оны техникалық нокаутпен жеңді. Елеусінов бірінші раундта қарсыласын нокдаунға жіберсе, бесінші раунд аяқталғаннан кейін Нойнайдың секунданты жекпе-жекті жалғастырудан бас тартты.

«Данияр Елеусіновпен әріптестік орнатқан Крис Гловердің айтуынша, қазақстандық боксшы жақын арада қатарға қосылып, алғашқы орта салмақта өнер көрсететін болады», - деп жазды журналист The Ring-те жарияланған мақалада.

Бүгінге дейін Данияр Елеусінов жартылай орта салмақта өнер көрсетіп келген еді. Осы салмақта ол IBO чемпионы болған. Ал, әуесқой бокста Данияр – Рио Олимпиадасының чемпионы.