Біз де таныстық: енді Қазақстан боксшылары АЭС-ті қолдап ролик түсірді
Соңғы бір күнде АЭС салуды қолдау арналған акцияларға жұлдыздар да тартыла бастады, деп хабарлайды Sport Plus Qazaqstan.
Бұл жолы бокстан Қазақстан ұлттық құрамасының өкілдері пікір білдіріп, видеоролик түсірген.
Роликке боксшылардан ағайынды Айбек пен Нұрбек Оралбай және Абылайхан Жүсіпов түскен. Сондай-ақ, Amanat партиясының өкілі де бар.
«Мемлекет басшымыз Қасым-Жомарт Тоқаев 2 қыркүйектегі жолдауында Қазақстанда атом электр стансасын салуды ұсынды. Бізді АЭС жобасымен Amanat партиясы таныстырды. Біз танысып шықтық. АЭС салуды Қазақстан бокс құрамасы қолдайды. 6 қазан күні өтетін жалпы халықтық референдумға баршаларыңызды шақырамыз», - дейді боксшылардың атынан сөйлеген құрама капитаны Айбек Оралбай.
Боксшылардың қасында Amanat партиясы Шымкент қалалық филиалының атқарушы хатшысы Мұрат Жолдыхожаев бар. Ол бұған дейін Қайрат Нұртас түскен роликте де болған еді.
