Бес баланың анасына - бес миллион теңге

Қазақстан бокс федерациясы 2024 жылғы ересектер арасындағы Азия чемпионатының және жастар арасындағы әлем чемпионатының жеңімпаз және жүлдегерлерін марапаттады, деп хабарлайды Sport+

Астанада өткен іс-шарада 2024 жылдың соңғы ресми біріншіліктерінің үздіктеріне ақшалай сыйақы табысталды. Чиангмэйдегі (Таиланд) Азия чемпионатының қорытындысы бойынша 10 алтын, 4 күміс және 6 қола медаль еншіледі. Азия чемпиондарына 3.5 миллион теңге, күміс жүлдегерлерге 1.5 миллион теңге, ал қола медаль иелеріне 700 000 теңге берілді. Сонымен қатар, әр жүлдегердің жеке бапкері де елеусіз қалмады. Ал, ұлттық құраманың бас бапкерлеріне 4 миллион теңгеден, аға бапкерлерге 2 миллин теңгеден үлестірілді.

Азия чемпионатының қола жүлдегері, бес баланың анасы Айгерім Сәттібаеваға ерекше көңіл бөлініп, 5 миллион теңге табысталды.

Оған қоса Будвадағы жастар арасындағы әлем чемпионатында 6 алтын, 1 күміс және 9 қола медаль еншілеп, тарихи нәтиже тіркелген еді. Осы біріншілікте чемпион атанған боксшыларға 2 миллион теңге, күміс жүлдегерге 1 миллион, қола жүлдегерлерге 700 000 теңгеден берілді. Сонымен қатар, жеке бапкерлер, құраманың аға жаттықтырушылары және дәрігерлері де ақшалай сыйақыға ие болды.