Бек Нұрмағанбет кәсіби деңгейде 13-ші жеңісіне қол жеткізді

Қазақстандық кәсіби боксшы Бек Нұрмағанбет АҚШ-та өткен турнирде кезекті жеңісіне жетіп, өзінің мінсіз рекордын сақтап қалды, деп хабарлайды Sport+.

Спортшы Сан-Хасинто қаласында (Калифорния штаты) өткен бокс кешінде өнер көрсетті. Орта салмақтағы (76,2 келіге дейін) оның қарсыласы мексикалық Хоакин Мурриета Лусио болды.

Жекпе-жек сегіз раундқа жоспарланғанымен, екінші раундта аяқталды. Нұрмағанбет нокаутпен жеңіске жетіп, жеңісті сериясын ұзартты.

26 жастағы қазақстандық спортшы кәсіби рингтегі барлық 13 жекпе-жегінде жеңіске жетті, оның 11-ін мерзімінен бұрын аяқтады. Ол әлемдегі ең танымал әрі титулды боксшылардың бірі Сауль «Канело» Альварес командасының мүшесі.