Артур Шушеначев «Қайраттан» израильдік клубқа ауысты
Қазақстандық Артур Шушеначев Алматының «Қайратынан» израильдік «Хапоэль» (Беэр-Шева) командасына ауысты, деп хабарлайды Sport Plus Qazaqstan.
«Қайрат» футбол клубының баспасөз қызметінен мәлім еткеніндей, қос команда 25 жастағы шабуылшының трансфері бойынша келісімге келген.
«Тараз» футбол клубының түлегі Артур «Қайратқа» 2017 жылдың көктемінде қосылып, сол маусымда негізгі команда сапында алғашқы матчын өткізді. 2018 жылы командамен бірге Қазақстан кубогін жеңіп алды. Ал 2020 жылы «Қайрат» құрамында Қазақстан чемпионы атанды.
2021 жылы ол еурокубоктің топтық кезеңінде дебют жасады. Қазақстан кубогінің финалында шешуші гол соғып, команданың аталған трофейді екінші рет жеңіп алуына көмектесті. Сол жылы барлық ресми матчта 23 гол соғып, қазақстандық футболшылар арасында үздік сұрмерген атанды.
А.Шушеначев «Қайрат» сапында барлығы 128 матч өткізіп, 45 гол соғып, 9 нәтижелі пас берді.
Transfermarkt мәліметіне қарағанда, Артур Шушеначев «Қайраттан» 500 мың еуроға сатып алынған.
