Әлем чемпионатының екінші күні алты боксшы жеңіске жетті

Бокстан жастар арасындағы әлем чемпионатының екінші күні шаршы алаңға Қазақстан құрамасының алты спортшысы шығып, барлығы жеңіске жетті, деп хабарлайды Sport+.

Ең жеңіл салмақта Диас Берікбай алғашқы айналымда венесуэлалық боксшыдан басым түсті. Кездесу нәтижесі - 5:0. 1/8 финалда Диас Сербия спортшысымен жұдырықтасады. 75 келіде Санжарәлі Бегалиев румын боксшысын 5:0 есебімен жеңді Келесі қарсылас - Болгария боксшысы Хашем Халил. 54 келіде Бауыржан Мұратов венесуэлалық қарсыласын 5:0 есебімен жеңді. Бауыржан келесі кезеңде Омар Асланлымен (Әзірбайжан) кездеседі.

Қыздар арасында 52 келіде Бағжан Отынбай ширек финалға өтті. Бұл күні ол түрік боксшысын 5:0 есебімен жеңді. Келесі айналымда Мексика өкілімен кездеседі. 70 келіде Мария Сидоренко 5:0 есебімен Сербия өкілін жеңді. Осылайша ол 1/4 финалға өтті, бұл кезеңде Түркия боксшысымен кездеседі. 57 келіде Аяжан Ермек 5:0 көрсеткішімен Испания спортшысынан басым түсті. Оның келесі қарсыласы Венесуэладан.